سارة ... قصة حقيقية

سارة
بنت شكلها زي بنات كتير اوي
محجبة
ملتزمة
لبسها طويل وواسع
من البيت للكلية ومن الكلية للبيت
حياتها كلها عبارة عن اخواتها وامها
وأبوها المهندس المتشدد جدا
الي بيعامل كل اخواتها احسن منها
وبيعاملها معاملة قاسية جدا لسبب هي نفسها عمرها ما قدرت تفهمه
سارة مالهاش غير صاحبة واحدة بس اسمها زيزي
دايما زيزي بتروح لسارة في البيت علشان والد سارة مش بيخليها تنزل غير للجامعة
او للمسجد
أقرب حد في الدنيا كلها لسارة هو اخوها محمد
اصغر منها بسنتين وهو احن مخلوق عليها
لما والدهم يكون مش موجود محمد كان بيقضي كل وقته مع سارة في اوضتها
يدردشوا سوا ويحكيلها عن سلمى الي هو بيحبها
ومستني يدخل الجامعة ويتخرج علشان يخطبها
وبيحكيلها انه عرفها من على الشات
وان التعارف علي الانترنت مش وحش اوي زي ما الناس فاكرة
وفي ناس محترمين كتير بيتعرفوا ببعض ويحبوا بعض وهما اصلا اتقابلوا على موقع شات
سارة اتشدت اوي لفكرة انها ممكن تتكلم مع حد ماتعرفهوش
تحكيلو مشاكلها وتفضفض معاه وهي عمرها ما هتشوفه تاني
مجرد كلام على شاشة هيختفي اول ما تقفل الكمبيوتر
طلبت سارة من محمد انه يعلمها ازاي تعمل شات
وفعلا محمد استنا يوم يكون والدها في مكتبه
ودخل اوضته هو وسارة وفتحوا الكمبيوتر وفتح الموقع الي اتعرف فيه على سلمى
محمد: اهو هو دا بقى الموقع
بصي انتي هتكتبي هنا وكلامك هيظهر للناس الي معاكي
ولو حد كلمك علي الخاص هيظهر في المربع ده
انا هسيبك وهنزل بقى علشان عندي درس بس اوعي ماما تشوفك
لو دخلت اقفلي الموقع علي طول ماشي؟
سارة: حاضر
*************
بدات سارة تتابع كلام الناس في الدردشة وتشوفهم بيتكلموا عن ايه
وكانت مبتسمه ابتسامه عريضة اوي
حاسة انها لاول مرة موجودة وسط الناس
وبتتكلم معاهم من غير ما تكون خايفة باباها يعرف ويضربها
او حتى يحبسها زي ما بيحبسها كل ما تتاخر عن ميعادها ربع ساعة..
فجأة ظهر لسارة رسالة خاصة
يوسف: هاي
سارة: هاي
يوسف: ممكن اتعرف؟
سارة: ممكن
يوسف: انا يوسف من القاهرة وعمري 19 سنة وانتي؟
سارة: وانا سارة وعمري 18 سنة

وبدأ يوسف وسارة يتعرفوا علي بعض اكتر
وعرفوا انهم هما الاتنين في جامعة واحدة وفي كلية واحدة وان يوسف اكبر من سارة بسنة
وبداو يتكلموا عن الجامعة والمحاضرات
وشوية وبدأو يتكلموا عن حياتهم اليومية وعائلاتهم وصحابهم
وعن شكلهم وزوقهم وطباعهم
بيحبوا ايه وبيكرهوا ايه
وفجاة يوسف قاطع سارة بسؤال
سارة انتي مرتبطة؟؟
سارة: لاء
ولا عمرك ارتبطتي قبل كدا؟
سارة: انا عمري ما حبيت اصلا
صاحبتي بتحكيلي انها بتحب واحد وهو بيحبها
بس انا عمري ما عرفت ولد في حياتي اصلا
يوسف: تعرفي يا سارة
انا بحلم ارتبط ببنت اكون انا اول واحد في حياتها
انا حاسس اني مرتاح ليكي اوي يا سارة
هو انا ممكن أشوفك في الجامعة؟
سارة: لاء طبعا ماينفعش
يوسف: اوكي زي ما تحبي بس اوعديني اننا نتكلم تاني هنا كل يوم
سارة: اكيد
انا كمان ارتاحت في الكلام معاك اوي
اول مرة اصلا اكلم ولد في حياتي وحاسة انها مش حاجة وحشة زي ما انا كنت فاكرة
انا هقفل بقى دلوقتي علشان ماما بتناديني
يوسف: ماشي بس هستناكي بكرة في نفس الميعاد
مع السلامة يا سارة
سارة: مع السلامة
**************
قفلت سارة وهي بتفكر
يا ترا الي انا عملته ده صح؟
انا اتكلمت معاه وانا معرفهوش وحكيتلو عني وعن صحابي وعن عيلتي كلها
دا انا حتى وصفتلو شكلي ايه
انا نفسي اشوفه اوي
انا ليه قولتله لاء؟
ما انا ممكن اشوفه في الجامعة اسلم عليه بس وادخل المحاضرة علي طول
دقيقتين بس يعني مش هيكون فيها حاجة
بكرة لما يكلمني هقوله اني موافقة اشوفه.....
يتبع

في نفس الميعاد الي اتكلموا فيه دخلت سارة الشات الي كلمت عليه يوسف
وفضلت مستنياه بس هو مكانش موجود
عدت ساعتين او اكتر وهي مستنية اي كلمة من يوسف بس يوسف ما دخلش
وقبل ما تقفل الشات لقت رسالة من يوسف
سارة الحمد لله اني لقيتك
معلش اني ماعرفتش ادخل النهاردة بس دا رقمي ومستنيكي تكلميني
وكتب يوسف رقمه وخرج من قبل سارة حتى ما تسلم عليه
وفضلت سارة مستنياه يدخل تاني ومادخلش
وبقت في حيرة ومش عارفة تعمل ايه المفروض انها تكلمه
لا طبعا مش هكلمه
بابا لو عرف هيقتلني
بس هو هيعرف منين ماهو ماعرفش اننا بنتكلم علي الشات
انا هكلمه وخلاص مافرقتش كتير تليفون من شات يعني
هو كدا كدا مش شايفني ولا انا شايفاه ومفيهاش حاجة ندردش شوية
انا زهقانة اوي ... هقوم اكلمه
وفعلا اتصلت سارة بالرقم

يوسف: ألو؟
سارة: ايوة
يوسف معايا؟
يوسف: اه مين حضرتك؟
سارة: انا الي كنت بكلمك امبارح علي الشات وانت......
يوسف: ازيك يا سارة
كنت متاكد انك هتتصلي
وحشتيني
سارة
سارة انتي معايا؟؟؟
سارة: ايوة معاك
يوسف: سارة انا عايز اشوفك
سارة: لاء طبعا مش هاينفع
يوسف: عموما انا هخلص محاضراتي بكرة الساعة 3 وهستناكي قدام الكافيتيريا في الكلية
انا هكون لابس تيشيرت ابيض وبنطلون جينز اسود
مستنيكي يا سارة
وسارة ساكتة ومش بترد ولا عارفة تقول ايه
وانتهت المكالمة علي كدا
وفضلت سارة تفكر تروحله ولا لاء
طيب ايه الي فيها لو روحتله يعني
انا هسلم عليه واشوف شكله وهمشي
وبعدين احنا هنبقى في الجامعة ووسط الناس
ومش هقعد معاه اصلا هي دقيقة وبس
كمان ماحدش هيعرف يعني هو بابا معايا في الجمعة كمان!!
أيوة انا هروح اشوف شكله ايه

وفعلا تاني يوم الساعة تلاتة راحت سارة للكافيتيريا وشافته من بعيد
واقف مستنيها وشكله زي ما وصفلها بالظبط
وقفت سارة للحظة في مكانها مترددة تروح او لاء
وبعد دقيقة او دقيقتين راحت فعلا
وسلمت عليه وهي وشها في الارض
سارة: علي فكرة انا جاية بس اسلم عليك علشان ما تزعلش
بس مش هينفع نقعد مع بعض كتير علشان انا مش عايزة اتأخر
يوسف: علي فكرة انتي شكلك زي ما تخيلتك بالظبط
سارة تتلخبط ووشها يحمر
انا همشي بقى سلام
يوسف: لالا استني بس شوية طيب نشرب حاجة ونمشي
سارة: لاء بجد مش هينفع اتأخر
يوسف: صدقيني مش هنتأخر هي 10 دقائق بس وهنمشي
ودخلوا الكافيتيريا وقعدوا مع بعض وطلبوا عصير
كل دا وسارة مش بتنطق ولا كلمة
بتفكر بينها وبين نفسها يا ترا صح الي هي بتعمله دا
ولو حد من زمايلها شافها هيقول ايه؟

بس هيقولوا ايه يعني
ماهي الجامعة كلها اهو شباب وبنات قاعدين مع بعض عادي يعني
وبعدين احنا في مكان محترم
مفيهاش حاجة يعني
انا هخليني طبيعية

سارة
سارة
يا سااااااارة
ايه بنادي عليكي من الصبح انتي روحتي فين؟
سارة : لاء ابدا معاك
يوسف: طيب انتي هتفضلي باصة في الأرض كدا؟
سارة: عادي يعني
يوسف: طيب شكل المكان مضايقك علشان الزحمة
تعالي نتمشا شوية في الجامعة
وقاموا مع بعض يتمشوا في الجامعة وهما بيدردشوا مع بعض
بيتكلموا عن حياتهم وكل حاجة فيها
يوسف حكالها عن صاحبه احمد الي تقريبا مش بيفارقوا بعض غير في الجامعة
وعن ياسمين الي كان مرتبط بيها قبل كدا واتجرح منها جرح كبير اوي
وعن شغله الي بيشتغله جنب الدراسة
كل دا وسارة بتسمع وبس
ولما بتتكلم عن حاجة بتتكلم عن زيزي صاحبتها

سارة هو انتي ليه دايما بتحكيلي عن زيزي ومش بتكلميني عن نفسك خالص؟
سارة: انا حياتي فاضية اوي تقريبا مافيهاش حاجة تتحكي
معرفش في حياتي كلها غير اهلي وقرايبي وزيزي
ودلوقتي انتا كمان
يوسف: طيب وانا بالنسبة ليكي دلوقتي صاحب ولا زميل ولا صديق ولا ايه بالظبط؟
سارة: مش عارفة
يوسف: سارة انا هصارحك بحاجة
انا معجب بيكي جدا من اول مرة كلمتك فيها
معجب بيكي حتى من قبل ما اشوفك
وانا عايزك تكوني معايا دايما يا سارة ونكمل حياتنا سوا
ساكتة ليه ؟
سارة: والمفروض اقول ايه؟
يوسف: قوليلي انتي مشاعرك ايه من ناحيتي
سارة: بجد مش عارفة
انا...........
وقاطع كلام سارة صوت صفارة الحرس الجامعي
كل الطلاب لازم تخرج علشان ابواب الجامعة هتتقفل
الساعه 9 بالليل !!!!!!
سارة:ايه دا الساعه 9
يا لهوي بابا هيقتلني
مسكت سارة موبايلها الي كان معمول صامت ونسيت ترجعه بعد المحاضرة
بابا اتصل بيا 35 مرة
وانهارت سارة وجريت ناحية باب الجامعة وهي مرعوبة وبتبكي ويوسف وراها

طيب استني متخافيش مش هيحصل حاجة
انا هوقفلك تاكسي يوصلك بسرعه
ووقفلها يوسف تاكسي وركبها

اول ماتوصلي يا سارة كلميني طمنيني انك وصلتي

وطلع التاكسي من غير ما سارة تنطق ولا كلمة ومرعوبة طول الطريق
واول ما وصلت بيتها ورنت الجرس
فتحلها والدها!!
ودخلت من غير ما ينطق ولا كلمة

انا آسفة والله يا بابا انا.........

قطع كلام سارة كف والدهاعلي خدها
بمنتهى القوة والقسوة
وقعت سارة علي الأرض شبه فاقدة للوعي
مش حاسة بحاجة غير اصوات مش واضحة

حرام عليك كفاية كدا هتموتها
كفاية حرام عليك
انتا هتموتلي بنتي
.
.
.
متخافوش يا جماعة الاسعاف في الطريق.
.
.
سارة .. يا حبيبتي ردي عليا.
.
.
يا ماما الدم دا جاي منين؟؟؟.
.
.
متخافوش كدا يا جماعة دا ارتجاج بسيط في المخ
هي اخدت حقنة مهدئة وإن شاء الله هتبقى بخير.....

اللهم اجعلها عبرة لكل من يعتبر
شكرا لكم علي الموضوع

سارة ... قصة حقيقية

سارة ... قصة حقيقية

رد: سارة ... قصة حقيقية

رد: سارة ... قصة حقيقية